Literature (ಸಾಹಿತ್ಯ)

ಸಸ್ಯ ಲೋಕದ ವಿಸ್ಮಯಕಾರಿ ಮಾಂಸಹಾರಿ ಸಸ್ಯಗಳು: heggaddesamachar

Spread the love

ಅಂಕಣ ಬರಹ: ಲತಾ ಸಂತೋಷ್ ಶೆಟ್ಟಿ ಮುದ್ದುಮನೆ 

ಅಂದು ಮುಂಜಾನೆ ಗಂಡ ಮತ್ತು‌ ಮಗನೊಂದಿಗೆ ವಿಶ್ವವಿಖ್ಯಾತ  ಬೆಂಗಳೂರಿನ ಲಾಲ್ ಬಾಗ್ ಸಸ್ಯ ಕಾಶಿ ಬೊಟಾನಿಕಲ್ ಗಾರ್ಡನ್ ಸಸ್ಯ ವಿಜ್ಞಾನ‌ ತೋಟಕ್ಕೆ ಹೋದಾಗ  ನೋಡಿದ ಸಸ್ಯ ರಾಶಿಗಳಲ್ಲಿ ವಿಶೇಷವಾಗಿ ನನ್ನನ್ನು ಕಾಡಿದ್ದು  ಮಂಸಹಾರಿ ಸಸ್ಯಗಳು.  ಈ ಸಸ್ಯಗಳ ಬಗ್ಗೆ ಅರಿಯುವ ಸುಂದರ ಅವಕಾಶವೊಂದು ದೊರೆಯಿತು. ಮನುಷ್ಯರಲ್ಲಿ  ಮಾಂಸಹಾರಿ, ಸಸ್ಯಹಾರಿಗಳೆಂಬ  ಎರಡು ‌ವರ್ಗವಿರುವಂತೆ ಸಸ್ಯ ಲೋಕದಲ್ಲಿ ಮಾಂಸ ಹಾರಿ ಅಥವಾ ಕೀಟಹಾರಿ ಸಸ್ಯಗಳಿವೆ. ಅಬ್ಬಾ…. ಸೃಷ್ಟಿಯ ವೈಚಿತ್ರ್ಯವೇ. ಸಸ್ಯ ಜಗತ್ತು  ಹಲವು ವಿಸ್ಮಯ ಹಾಗೂ ಅದ್ಬುತಗಳನ್ನು ತುಂಬಿ ಕೊಂಡಿರುವುದು ಹೌದು. ಮಾಂಸ ಹಾರಿ ಸಸ್ಯಗಳನ್ನು  ನೋಡುವಾಗ ಜಾದುಗಾರ ಸಸ್ಯಗಳೊ  ಎಂಬಂತೆ ಹಲವಾರು  ರೋಚಕ ‌ವಿಚಾರ ನನ್ನ ಎದುರಾಯಿತು. ಮಾಂಸಹಾರಿ ಸಸ್ಯಗಳ ಬದಿಯಲ್ಲಿ ತಾಳ್ಮೆ ಯಿಂದ ಕುಳಿತು ಇವುಗಳ ಚಲನವಲನ ಗಮನಿಸಿದಾಗ ಗಿಡದ ರೂಪ ತಳೆದು ಹೊಟ್ಟೆ ತುಂಬಿಸಿ ಕೊಳ್ಳಲು ಜೀವ ಜಂತುಗಳನ್ನು‌ ಆಹಾರವಾಗಿ ಬಳಸುವುದು ನೋಡುಗರನ್ನು ಬೇಸ್ತು ಬೀಳಿಸುತ್ತದೆ.

ಮಕರಂದಕ್ಕೊಸ್ಕರ ಬರುವ ಕೀಟ ಭಕ್ಷಕ ಸಸ್ಯಗಳಲ್ಲಿ‌ನೂರಾರು ಪ್ರಬೇದಗಳು ಲಾಲ್ ಬಾಗನಲ್ಲಿದೆ. ಅವುಗಳಿಗೆ ಪೂರಕವಾಗಿ ಸಹಜ ವಾತಾವರಣದಲ್ಲಿ ಮಾಂಸಹಾರಿ ಸಸ್ಯ ‌ಪ್ರಬೇದಗಳನ್ನು ಬೆಳಸಲಾಗಿದೆ. ‌ಸಸ್ಯದ ಎಲೆ, ಫಲ ಪುಷ್ಪಗಳನ್ನು ಕೀಟಗಳು ತಿನ್ನುವುದು ಸಾಮಾನ್ಯ ತಾನೆ. ಕೀಟ, ದುಂಬಿಗಳು ಹೂವಿನ ಮಕರಂದ ಹೀರುವುದನ್ನು‌ ನೋಡಿದ್ದೇವೇ .ಆದರೆ ಕೀಟ, ದುಂಬಿ, ಚಿಟ್ಟೆ , ಚಿಕ್ಕ ಕಪ್ಪೆ ಮರಿಗಳನ್ನು ಹಾಗೂ ಅನೇಕ ಜೀವ ಜಂತುಗಳನ್ನು  ಭಕ್ಷಿಸುವ ನೂರಾರು ಮಾಂಸಾಹಾರಿ ಸಸ್ಯ ಪ್ರಬೇದ ನೋಡಿದಾಗ ಸೃಷ್ಟಿಯ ವೈಚಿತ್ರ್ಯಕ್ಕೆ ಬೆರಗಾದೆ. ವೈಜ್ಞಾನಿಕವಾಗಿ  ಅರಿವು ಮೂಡಿಸುವ  ತರಬೇತಿದಾರರು ಈ ಗಿಡಗಳು  ಕೀಟ ಹುಳು ಹಪ್ಪಟೆಗಳನ್ನು‌ ಹೇಗೆ ಆಕರ್ಷಿಸುತ್ತದೆ  ಹಾಗೂ ‌ ಅವು ಹೇಗೆ ‌ಬಲಿಯಾಗುತ್ತವೆ ಎಂಬುದರ ಬಗ್ಗೆ ಮಾಹಿತಿಯನ್ನು ಇಲ್ಲಿ ಪ್ರವಾಸಿಗರಿಗೆ‌ ತಿಳಿ‌ಹೇಳುವುದು ‌ಶ್ಲಾಘನೀಯ.

ಕೀಟಗಳನ್ನು  ತಿನ್ನುವ  ಕೆಲ ಸಸ್ಯಗಳು‌ ಸಾಮಾನ್ಯ ‌ಸಸ್ಯಗಳಂತೆ  ಇದ್ದು ಗದ್ದೆ, ತೋಟ , ಕಾಡು‌ ,ಗುಡ್ಡ , ಬೆಟ್ಟ ಪ್ರದೇಶಗಳಲ್ಲಿ ಲಭ್ಯ. ಆದರೆ ಮಾಂಸ ಭಕ್ಷಿಸುವ ಗಿಡಗಳು  ಎಂಬ ವಿಚಾರವೇ ರೋಚಕದೊಂದಿಗೆ  ಆಶ್ಚರ್ಯವನ್ನು  ಮೂಡಿಸಿತು.  5 ರಿಂದ 10 ಸೆಂಟಿಮೀಟರ್ ಹಾಗೂ 2 ರಿಂದ 3 ಮೀಟರ್ ಎತ್ತರದ  ವಿವಿಧ ಜಾತಿಯ ಮಾಂಸಹಾರಿ ಗಿಡಗಳನ್ನು ವೈಜ್ಞಾನಿಕವಾಗಿ ಗುರುತಿಸಲಾಗಿದೆ . ಕೀಟಗಳನ್ನು ಬರಸೆಳೆವ ಇವುಗಳ ಜಾಣ್ಮೆ, ಬೇಟೆಯಾಡುವ  ಶೈಲಿಗೆ ದುಂಬಿ, ಜೇನು ನೊಣಗಳು, ಚಿಟ್ಟೆ ಗಳು  ಆಹ್ವಾ ನಿತರಂತೆ  ಬಂದು ಬಲಿಯಾಗುತ್ತದೆ. ಇಲ್ಲಿ ನಾವು ಆಶ್ಚರ್ಯಗೊಳ್ಳುವ ವಿಚಾರವೆಂದರೆ ಮಾಂಸಹಾರಿ ಸಸ್ಯಗಳು ಚಲನೆ ಹೊಂದಿರುವುದಿಲ್ಲ. ಕೀಟಗಳು ತಾವಾಗಿಯೇ ಜಾಲಗಳಲ್ಲಿ ಬಿದ್ದಾಗ  ಅವು  ತಪ್ಪಿಸಿಕೊಳ್ಳದಂತೆ  ತಮ್ಮ ದ್ವಾರವನ್ನು ಮಡಚಿಕೊಳ್ಳುವ  ಜಾಣ್ಮೆಯೇ  ಈ  ಸಸ್ಯಗಳ ಹೊಟ್ಟೆ ತುಂಬಿಸಿಕೊಳ್ಳಲು  ಇರುವ ಉಪಾಯ. ಸಣ್ಣ ‌ಪುಟ್ಟ ಪ್ರಾಣಿಗಳನ್ನು ತಿಂದು ಅರಗಿಸಿಕೋಳ್ಳುವ  ಪೂರ್ಣ ಪ್ರಮಾಣದ ಮಾಂಸಹಾರಿ ಸಸ್ಯಗಳು  ಕಿಣ್ವ ಬ್ಯಾಕ್ಟೀರಿಯಾದ ನೆರವಿನಿಂದ ಜೀರ್ಣಿಸಿಕೊಳ್ಳುತ್ತವೆ. ಇವು ಸಸ್ಯ ಜಗತ್ತಿನ ವಿಸ್ಮಯಗಳಲ್ಲಿ ಒಂದು ಅದರಲ್ಲೂ ಅರೆ ಹಾಗೂ ಪೂರ್ಣ ಪ್ರಮಾಣದ ಮಾಂಸಹಾರಿ ಸಸ್ಯಗಳೆಂದು  ವಿಗಂಡಿಸಲಾಗಿದೆ. 

ಇತರ ಸಾಮಾನ್ಯ ಸಸ್ಯಗಳಂತೆ ಬೇರುಗಳ ಮೂಲಕ ಆಹಾರ, ನೀರು, ಪಡೆಯುವ  ಈ ಸಸ್ಯಗಳು ಯಾಕೆ ‌ಮಾಂಸಹಾರಿಗಳಾದವು ಎಂಬುದುದಕ್ಕೆ ಇಲ್ಲಿನ ತಜ್ಞರು ಹೀಗೆ ಉತ್ತರಿಸುತ್ತಾರೆ. ಸಾಮಾನ್ಯ ಸಸ್ಯಗಳು ಸಾರಜನಕ ವನ್ನು ತಮ್ಮ ಬೇರುಗಳ ಮೂಲಕ ಮಣ್ಣಿನಿಂದ ಪಡೆಯುತ್ತವೆ. ಆದರೆ ಮಾಂಸಹಾರಿ ಸಸ್ಯಗಳು ಸಾರಜನಕವನ್ನು ಬೇಟೆಗಳಿಂದ  ಒದಗಿಸಿಕೊಳ್ಳುತ್ತವೆ. ಮಣ್ಣಿನಲ್ಲಿರುವ  ಪೌಷ್ಟಿಕಸತ್ವದ ಕೊರತೆಯನ್ನು ಇವು ಬೇಟೆಯಾಡಿ ನೀಗಿಸಿಕೋಳ್ಳುತ್ತವೆ.

ನಮ್ಮ ದೇಶದಲ್ಲಿ ನೈಸರ್ಗಿಕವಾಗಿ ಕಂಡುಬರುವ ಪ್ರಮುಖ ಮಾಂಸಹಾರಿ ಸಸ್ಯಗಳಲ್ಲಿ ನೀರು ಗುಳ್ಳೆ, ಇಬ್ಬನಿ ಮತ್ತು ಹೂಜಿ ಸಸ್ಯದ ಮಾಹಿತಿಯನ್ನು  ಸಸ್ಯ ಶಾಸ್ತ್ರಜ್ಞರು ಭೂತಗನ್ನಡಿ  ಹಿಡಿದು ಈ ಸಸ್ಯ ದ ಜಾಲಗಳಲ್ಲಿ ಚಿಕ್ಕ ಚಿಕ್ಕ ಚೂಪಾದ ರೊಮಗಳನ್ನು, ರೊಮಗಳಲ್ಲಿನ ಅಂಟುದ್ರವವನ್ನು ‌ಸ್ರವಿಸುವ ಗ್ರಂಥಿಗಳನ್ನು ಹಾಗೂ ತನ್ನ ಆಕರ್ಷಕ ಬಣ್ಣದ ಸಹಾಯ ದಿಂದ ಕ್ರಿಮಿ, ಕೀಟ ವನ್ನು ಹಿಡಿವ ಪರಿಯನ್ನು ‌ಪ್ರಾಯೋಗಿಕವಾಗಿ ತೋರಿಸುತ್ತಾರೆ. ನಾನು ನೋಡಿದ ಮಾಂಸಹಾರಿ ಸಸ್ಯಗಳಲ್ಲಿ ಸೂಜಿ ಗಿಡ ಅಥವಾ ಕೊಳವೆಗಿಡ ಸುಂದರ ಹಾಗೂ ಆಕರ್ಷಕ ವಾಗಿತ್ತು. ಸೂಜಿಗಿಡದ  ಒಳಗೆ ಯಾವುದೇ ಕ್ರಿಮಿ ಕೀಟಗಳು ಬಿದ್ದ ತಕ್ಷಣ ಈ ಗಿಡ  ಅವಸರದಲ್ಲಿ ಬಾಯಿ ರೂಪದ ಎಲೆ ಮುಚ್ಚಿ ಕೊಳ್ಳುತ್ತದೆ. ಇನ್ನೂ ಬಣ್ಣ ಬಣ್ಣದ ಚಮಚದ ಆಕಾರದ ಮಾಂಸಹಾರಿ ಸಸ್ಯಗಳ ದ್ರವ ಬಿಸಿಲಿಗೆ ಒಣಗಿ ಮಂಜಿನ ಹನಿಗಳಂತೆ ಹೊಳೆಯುತ್ತವೆ.  ಕೆಲಗಿಡಗಳು ಕೀಟಗಳನ್ನು ಆಕರ್ಷಿಸಿ ಹಿಡಿಯಲು ಎಲೆಗಳನ್ನು ಜಾಲಾವಾಗಿ‌ ಮಾರ್ಪಡಿಸಿ ಮಾಂಸಹಾರಕ್ಕಾಗಿ ತಮ್ಮ ‌ಬಲೆ‌ ಬೀಸುವ ರೀತಿ ಒಂದಕ್ಕಿಂತ ಒಂದು ಭಿನ್ನವಾಗಿದ್ದು ಮೋಸದ ಬಲೆ‌ ಒಡ್ಡುದನ್ನು  ನೋಡಲು  ಬಲು  ಸೊಗಸು ಕೆಲ ಮಾಂಸಹಾರಿ ಸಸ್ಯಗಳಲ್ಲಿ ಕೀಟಗಳು ಎರಡು ಎಲೆಗಳ ನಡುವಿನ ‌ಸ್ಥಳದಲ್ಲಿ  ಕುಳಿತ ತಕ್ಷಣ ತಾನಾಗಿ ಮುಚ್ಚಿ ಕೋಳ್ಳುತ್ತದೆ. ಇದರ ಎಲೆಗಳ  ಸುತ್ತಲೂ ಚೂಪಾದ ಮುಳ್ಳುಗಳಿದ್ದು  ಬೇಟೆ  ತಪ್ಪಿಸಿಕೊಳ್ಳದಂತೆ ಕಾರ್ಯವೆಸಗುತ್ತದೆ. ಕ್ರಿಮಿ ,ಕೀಟಗಳಿಗೆ  ಈ ಮಾಂಸಹಾರಿ ‌ಸಸ್ಯಗಳು  ಸಾಮಾನ್ಯ ಸಸ್ಯಗಳಾಗಿ ಕಾಣಿಸುವುದು ಮೋಸ ಹೋಗಲು ಇನ್ನೊಂದು ಕಾರಣ. ಎಲ್ಲಾ ಮಾಂಸಹಾರಿ ಸಸ್ಯಗಳ ಆಹಾರ ಸೇವನೆಯನ್ನು ನೋಡುತ್ತಲಿದ್ದರೆ ಅತ್ಯಾಕರ್ಷಕ ಪ್ರದರ್ಶನವೊಂದನ್ನು  ನೋಡಿದಂತೆ ಭಾಸವಾಗುತ್ತದೆ.

Leave a Reply

Your email address will not be published. Required fields are marked *