Literature (ಸಾಹಿತ್ಯ)

ಬಿದಿರಿಗಿಲ್ಲ ಇನ್ನೂ ಕಾನೂನು ಬಂಧನ : heggaddesamachar

Spread the love

ಅಂಕಣ ಬರಹ: ಲತಾ ಸಂತೋಷ್ ಶೆಟ್ಟಿ ಮುದ್ದುಮನೆ

ವನಸಿರಿಯ ನಾಡು, ವೈವಿಧ್ಯಮಯ ಸಸ್ಯಸಂಕುಲಗಳ ಬೀಡು ಎಂಬ ಹೆಗ್ಗಳಿಕೆಯ ನಾಡು ಕರ್ನಾಟಕ. ಇಂತಹ ವಿಫುಲ ಸಸ್ಯಸಿರಿಯ ನಾಡಿನಲ್ಲಿ ಸಸ್ಯಗಳ ಪರಿಚಯ ಮಾನವನ ಚರಿತ್ರೆಯಷ್ಟೇ ಪುರಾತನವಾದುದು. ಆದರೆ ಇಂದು ಬಳಕೆಯಲ್ಲಿದ್ದ ಅನೇಕ ಸಸ್ಯಗಳ ಬಗೆಗಿನ ದಾಖಲೆಗಳು ದುರ್ಲಭವಾಗಿದೆ. ವೈವಿಧ್ಯಮಯ ಹವಾಗುಣ ಹೊಂದಿರುವ ಕರ್ನಾಟಕದಲ್ಲಿ ಬಿದಿರು ಬೆಳೆಸಿ ಅವುಗಳನ್ನು ಸಂರಕ್ಷಿಸುವ ಅಗತ್ಯವಿದೆ. ಬಿದಿರು ಬೆಳೆಯ ಅಭಿವೃದ್ಧಿಗೆ ಸರಕಾರ, ಅರಣ್ಯ ಇಲಾಖೆ, ಸಸ್ಯಶಾಸ್ತ್ರ ವಿಭಾಗ ಜಾಗೃತರಾಗಿ ಬಿದಿರಿನ ಬೆಳೆ ಬೆಳೆಯಲು ಬೇಕಾದ ಸಲಹೆ ಸೂಚನೆಗಳನ್ನು ಜನಸಾಮಾನ್ಯರಿಗೆ ಸಸ್ಯ ಶಾಸ್ತ್ರಜ್ಞರು ನೀಡುತ್ತಾ ಬಂದಲ್ಲಿ ಅಪರೂಪದ ಪ್ರಭೇದವಾದ ಬಿದಿರಿನ ಬೆಳೆಯಲ್ಲಿ ಅಭಿವೃದ್ಧಿಯಾಗಬಹುದು.
ರಾಷ್ಟ್ರಪತಿ ರಾಮ್‍ನಾಥ್ ಕೋವಿಂದ್ ಅವರು ಇದೇ 2017ರ ನವಂಬರ್‍ನಲ್ಲಿ ಮಹತ್ವದ ಭಾರತೀಯ ಅರಣ್ಯ ಕಾಯ್ದೆ 1927ರ ತಿದ್ದುಪಡಿ ಆದೇಶಕ್ಕೆ ಅಂಕಿತ ಹಾಕಿರುವ ಸುಗ್ರೀವಾಜ್ಞೆಯ ಪ್ರಕಾರ ಅರಣ್ಯ ಕಾಯ್ದೆಯ ಎರಡನೇ ಸೆಕ್ಷನ್ ಏಳನೇ ವಿಧಿಯಡಿ ಬಿದಿರಿನ ಶಬ್ದವನ್ನು ಕೈಬಿಡಲಾಗಿದೆ. ಅರಣ್ಯೇತರ ವಲಯಗಳಲ್ಲಿ ಬೆಳೆಯುವ ಬಿದಿರುಗಳನ್ನು ಮರಗಳ ವ್ಯಾಖ್ಯಾನದಿಂದ ತೆಗೆದುಹಾಕಿ ಅವುಗಳನ್ನು ಕಡಿದು ಸಾಗಿಸುವುದಕ್ಕೆ ಅನುಕೂಲ ಮಾಡಿಕೊಡಲಾಗಿದೆ. ರೈತರು ತಾನೇ ಬೆಳೆದ ಬಿದಿರನ್ನು ಕಡಿಯಲು ಅನುಮತಿ ಹಾಗೂ ಸಾಗಾಟಕ್ಕೆ ಪರವಾನಗಿ ಈ ಮೊದಲು ಪಡೆದುಕೊಳ್ಳಬೇಕಿತ್ತು. ಇಂತಹ ಕ್ರಮದಿಂದ ಬಿದಿರಿನ ಕೃಷಿಗೆ ಉತ್ತೇಜನ ದೊರೆಯುವುದಲ್ಲದೆ 2022ರ ವೇಳೆಗೆ ಬಿದಿರು ಬೆಳೆಗಾರರ ಆದಾಯ ದ್ವಿಗುಣಗೊಳಿಸುವುದಕ್ಕೂ ಅನುಕೂಲವಾಗಿದೆ. ಬಿದಿರನ್ನು ಇನ್ನು ಮುಖ್ಯ ಬೆಳೆಯನ್ನಾಗಿ ಅಥವಾ ಉಪಬೆಳೆಯನ್ನಾಗಿ ಬೆಳೆಯಬಹುದು.


ಬಿದಿರು ಉದ್ಯಮ ಇಂದು ಜಾಗತಿಕ ಮಟ್ಟದಲ್ಲಿ ಉತ್ತಮ ವಹಿವಾಟು ನಡೆಸುತ್ತಿದ್ದು, ಬಿದಿರಿನ ಬಳಕೆ ಈಗ ನಮ್ಮ ದೇಶದಲ್ಲಿ ಮಾತ್ರವಲ್ಲದೆ ಜಗತ್ತಿನಾದ್ಯಂತ ಹೆಚ್ಚುತ್ತಿದ್ದು, ಪ್ರಪಂಚದಲ್ಲಿ 560 ಪ್ರಭೇದಗಳ ಬಿದಿರು ಸಸ್ಯಗಳಿವೆ ಎಂದು ಅಂದಾಜಿಸಲಾಗಿದೆ. ಹಾಗೆ ಭಾರತದಲ್ಲಿ 140 ಜಾತಿಯ ಬಿದಿರುಗಳಿವೆ ಎನ್ನಲಾಗುತ್ತಿದೆ. ಬಿದಿರು ಕೃಷಿ ಕೈಗಾರಿಕೋದ್ಯಮದವರೆಗೂ ವ್ಯಾಪಿಸಿದೆ. ರಾಜಮಹಾರಾಜರ ಕಾಲದ ಭಾರತೀಯ ಸಂಸ್ಕøತಿಯಲ್ಲಿ ಆಳವಾಗಿ ಬೇರೂರಿರುವ ಬಿದಿರು ಇಂದಿನ ಫ್ಯಾಶನ್ ಯುಗದಲ್ಲೂ ತನ್ನ ಅಸ್ತಿತ್ವವನ್ನು ಭದ್ರಗೊಳಿಸಿದೆ. ಅದರಲ್ಲೂ ನಮ್ಮ ದೇಶದಲ್ಲಿ ಇನ್ನು ಮುಂದೆ ಮರಗಳ ವ್ಯಾಪ್ತಿಯಲ್ಲಿ ಬಿದಿರು ಇರುವುದಿಲ್ಲ. ಬಿದಿರನ್ನು ಕಡಿದು ಮಾರುವುದಕ್ಕೆ ಯಾವುದೇ ಅನುಮತಿ ಬೇಕಿಲ್ಲ ಎಂಬ ಕಾನೂನಿನಿಂದ ಗ್ರಾಮೀಣ ಪ್ರದೇಶದ ಜನರು ನಿರಾಳವಾಗಿದ್ದಾರೆ. ಮುಂದಿನ ದಿನಗಳಲ್ಲಿ ವ್ಯಾಪಕ ಪ್ರಮಾಣದಲ್ಲಿ ಬಿದಿರು ಬೆಳೆಯುವ ಸಾಧ್ಯತೆ ಇದೆ.
1980ರ ಅರಣ್ಯ ಸಂರಕ್ಷಣೆ ಕಾಯ್ದೆಯಡಿ ಬಿದಿರುಗಳನ್ನು ಅರಣ್ಯ ಪ್ರದೇಶದಲ್ಲಿ ಬೆಳೆಸುವುದನ್ನು ಮುಂದುವರಿಸುವುದಕ್ಕೂ ಅವಕಾಶ ನೀಡಲಾಗಿದೆ. ಈ ಸುಗ್ರೀವಾಜ್ಞೆಗೆ ಮೊದಲು ಬಿದಿರು ಭಾರತೀಯ ಅರಣ್ಯ ಕಾಯ್ದೆಯಡಿ ಮರಗಳ ವ್ಯಾಪ್ತಿಗೆ ಸೇರಿಸಲಾಗಿತ್ತು. ಹೀಗಾಗಿ ಅರಣ್ಯೇತರ ಭೂಮಿಯಲ್ಲಿ ರೈತರು ಬಿದಿರುಗಳನ್ನು ಬೆಳೆಸುವುದಕ್ಕೆ ಕಾನೂನಿನ ತೊಡಕು ಇತ್ತು. ಅರಣ್ಯೇತರ ಪ್ರದೇಶದಲ್ಲಿ ಬಿದಿರುಗಳನ್ನು ವಿಫಲವಾಗಿ ಬೆಳೆಸಲಾಗುತ್ತಿತ್ತು ಬಿದಿರು ಸಂಬಂಧಿ ಚಟುವಟಿಕೆಗಳಿಂದಲೇ ಅನೇಕರ ಜೀವನ ಸಾಗುತ್ತಿದೆ. 2011ರಲ್ಲಿ ಭಾರತದ ಕೆಲವು ರಾಜ್ಯಗಳಲ್ಲಿ ಬಿದಿರನ್ನು ಅರಣ್ಯ ಲಘು ಉತ್ಪನ್ನ ಎಂದು ಘೋಷಿಸಿವೆ. ಇದರಿಂದ ಆಯಾ ರಾಜ್ಯಗಳ ಒಳಗೆ ಬಿದಿರನ್ನು ಸಾಗಿಸಲು ಹೆಚ್ಚು ಅಡೆತಡೆ ಇರಲಿಲ್ಲ. ಆದರೆ ಅಂತಾರಾಜ್ಯ ಸಾಗಾಟಕ್ಕೆ ಹಲವು ಇಲಾಖೆಗಳಿಂದ ಪರವಾನಗಿ ಪಡೆದುಕೊಳ್ಳಬೇಕಿದೆ. ಹೀಗಾಗಿ ಬಿದಿರು ಕೃಷಿ ಭಾರತದಲ್ಲಿ ಪೂರ್ಣಪ್ರಮಾಣದಲ್ಲಿ ವಾಣಿಜ್ಯ ಸ್ವರೂಪ ಪಡೆದಿಲ್ಲ ಎಂಬ ಕಾರಣಕ್ಕಾಗಿ ಬಿದಿರನ್ನು ಕಡಿಯಲು ಮತ್ತು ಸಾಗಾಟ ಮಾಡಲು ಈ ತಿದ್ದುಪಡಿ ಕಾಯ್ದೆಯ ಅನುವು ಮಾಡಿಕೊಡಲಾಗಿದೆ.


ಬಿದಿರು ಮಣ್ಣಿನಿಂದ ಮೊಟ್ಟೆಯ ಚಿಪ್ಪಿನಂತೆ ಮೊಳಕೆಯೊಡೆದು ಮೇಲ್ಬಂದ ಪುಟ್ಟ ಸಸಿಗಳು ಒಂದೇ ವರ್ಷದಲ್ಲಿ 100 ಅಡಿ ಎತ್ತರ ಬೆಳೆಯಬಲ್ಲವು. ಬಿದಿರು ಹೂಬಿಡುವುದು ಸರಾಸರಿ 32 ವರ್ಷಗಳ ನಂತರ. 60 ರಿಂದ 120 ವರ್ಷ ಕಾಲ ಬಾಳುವ ಬಿದಿರು ಕೂಡ ಇದೆ. ಬಿದಿರನಲ್ಲಿ ಮುಳ್ಳು ಇರುವ, ಮುಳ್ಳು ಇರದ ಎರಡು ಬಗೆಯ ಪ್ರಕಾರದ ಹಾಗೂ ಗಂಟು ಇರುವ ಬಿದಿರುಗಳು ಇವೆ. ಕೆಲಬಿದಿರು ಹೂಬಿಟ್ಟು ಭತ್ತದ ತೆನೆಬಂದ ನಂತರ ಒಣಗಿ ಸಾಯುವ ಜಾತಿಯ ಬಿದಿರು ಇದೆ. ದಿನ ಒಂದಕ್ಕೆ 5 ರಿಂದ 7 ಅಂಗುಲ ಬೆಳೆಯುವ ಸಾಮಥ್ರ್ಯದೊಂದಿಗೆ ಭೂಕುಸಿತ, ಭೂಕಂಪನ, ಭೂಮಿ ಸವೆತವನ್ನು ತಡೆಗಟ್ಟುವ ಗುಣ ಬಿದಿರಿನ ಬೇರುಗಳಿವೆ. ಪರಿಸರ ಸಂರಕ್ಷಣೆಯಲ್ಲಿ ಬಿದಿರಿನ ಪಾತ್ರದ ಮಹತ್ವ ಅರಿತು ಕೇಂದ್ರ ರಸ್ತೆ ಸಾರಿಗೆ ಹಾಗೂ ಹೆದ್ದಾರಿ ಸಚಿವಾಲಯದ ಮಹತ್ವಾಕಾಂಕ್ಷಿ ಯೋಜನೆಯಲ್ಲಿ ಮುಂದಿನ ಆರು ವರ್ಷಗಳಲ್ಲಿ ರಾಷ್ಟ್ರೀಯ ಹೆದ್ದಾರಿಗಳ ಇಕ್ಕೆಲಗಳಲ್ಲಿ ಬಿದಿರು ಬೆಳೆಸಲು ಸರಕಾರ ನಿರ್ಧರಿಸಿದ್ದು ಕೆಲವೆಡೆ ಮಣ್ಣಿನ ಮಾದರಿಯನ್ನು ಪರೀಕ್ಷೆಗೊಳಪಡಿಸಲಾಗಿದೆ.
ಬಿಳಿಗಿರಿ ರಂಗನಬೆಟ್ಟು, ಬಂಡಿಪುರ, ನಾಗರಹೊಳೆ, ಕುದುರೆಮುಖ ಮುಂತಾದ ರಾಷ್ಟ್ರೀಯ ಉದ್ಯಾನ ಹಾಗೂ ವನ್ಯಜೀವಿಧಾಮಗಳಲ್ಲಿ ವಿಪರೀತವಾಗಿ ಬೆಳೆದ ಲಂಟಾನ, ಪಾರ್ಥೇನಿಯಂ, ನಂತರ ಕಳೆ ಕೀಳುವ ವ್ಯರ್ಥ ಕಸರತ್ತು ಕೈಬಿಟ್ಟು ಬಿದಿರು ನಾಟಿ ಮಾಡಲು ಅರಣ್ಯ ಇಲಾಖೆ ಮುಂದಾಗಿದೆ. ವ್ಯಾಪಕ ಪ್ರಮಾಣದಲ್ಲಿ ಬಿದಿರು ಬೆಳೆದಂತೆ ಕಳೆಸಸ್ಯಗಳು ತಾನಾಗಿಯೇ ನಾಶವಾಗಲಿದೆ. ಈ ಕುರಿತು ವೈಜ್ಞಾನಿಕ ಪರಿಶೀಲನೆಗಳು ನಡೆದು ಬಿದಿರು ಬೀಜಗಳನ್ನು ಬಿತ್ತಲಾಗಿದೆ. ಬಂಡಿಪುರದ ಅಭಯಾರಣ್ಯದಲ್ಲಿ ಬಿದಿರು ಬೀಜಗಳ ಬಿತ್ತನೆ ಮಾಡಲಾಗಿರುವುದನ್ನು ನೋಡುವ ಅವಕಾಶ ನನಗೆ ಸಿಕ್ಕಿತ್ತು.


ಕರ್ನಾಟಕದಲ್ಲಿ ಉತ್ತರಕನ್ನಡ, ಶಿವಮೊಗ್ಗ, ಹಾಸನ, ಕೊಡಗು, ಬೆಳಗಾವಿ, ಚಿಕ್ಕಮಗಳೂರುಗಳಲ್ಲಿ ಬಿದಿರು ಹೇರಳವಾಗಿ ಬೆಳೆಯುತ್ತದೆ. ಭಾರತದಲ್ಲಿ ಒಟ್ಟಾರೆ ವಾರ್ಷಿಕ ವಹಿವಾಟು ಸುಮಾರು 66 ಸಾವಿರ ಕೋಟಿ ರೂ ಎಂದು ಅಂದಾಜಿಸಲಾಗಿದೆ. ಕುಶಲ ಕರ್ಮಿಗಳಿಗೆ ಬೇಕಾಗುವಷ್ಟು ಬಿದಿರು ಪೂರೈಕೆ ಆಗುತ್ತಿಲ್ಲ ಅಂದರೆ ಬಿದಿರಿನ ಬೆಳೆಯ ಅಭಿವೃದ್ಧಿ ಏನೇನು ಸಾಲದು. ನಮ್ಮ ದೇಶದಲ್ಲಿ ಬಿದಿರು ಬೀಜ ತಯಾರಿಕೆ ಕೇಂದ್ರ ಹಾಗೂ ನರ್ಸರಿಗಳು ಕಡಿಮೆ ಇದ್ದು ರೈತರಿಗೆ ಬಿದಿರಿನ ಬೆಳೆ ಕುರಿತು ಮಾಹಿತಿ, ಸಲಹೆ ಸೂಚನೆಗಳ ಕೊರತೆ ಇರುವ ಕಾರಣ ಬಿದಿರಿನ ಉತ್ಪಾದನೆಯಲ್ಲಿ ಚೀನಾ ಮೊದಲ ಸ್ಥಾನದಲ್ಲಿದೆ. ಭಾರತ ಎರಡನೇ ಸ್ಥಾನದಲ್ಲಿದೆ. ಭಾರತದಲ್ಲಿ ಅತಿಹೆಚ್ಚು ಬಿದಿರು ಈಶಾನ್ಯ ರಾಜ್ಯ ಹಾಗೂ ಮಧ್ಯಪ್ರದೇಶಗಳಲ್ಲಿ ಬೆಳೆಯಲಾಗುತ್ತದೆ. ವಿಶ್ವದಲ್ಲೇ ಅತ್ಯಧಿಕ ಪ್ರಮಾಣದಲ್ಲಿ ಭಾರತದಲ್ಲಿ ಬಿದಿರು ಸಂಪನ್ಮೂಲವಿದೆ. ಆದರೆ ಇದನ್ನು ಸಮರ್ಪಕವಾಗಿ ಬಳಸಿಕೊಳ್ಳಲು ಅರಣ್ಯಕಾಯ್ದೆಯ ಮಿತಿಯಿಂದಾಗಿ ಸಾಧ್ಯವಾಗುತ್ತಿರಲಿಲ್ಲ. ಆದರೆ ಈಗ ಬಂದ ಹೊಸ ನಿಯಮ ಪ್ರಕಾರ ಖಾಸಗಿ ಪ್ರದೇಶದಲ್ಲಿ ಬೆಳೆದ ಬಿದಿರನ್ನು ಕಡಿಯಲು, ಬಳಸಲು ಅರಣ್ಯ ಇಲಾಖೆ ಅನುಮತಿ ಪಡೆಯಬೇಕಿಲ್ಲ. ಆದರೆ ಸರಕಾರಿ ಸ್ಥಳದಲ್ಲಿನ ಬಿದಿರಿಗೆ ಮೊದಲಿನ ಎಲ್ಲ ನಿರ್ಬಂಧ ಮುಂದುವರಿಯಲಿದೆ.

ಬಿದಿರಿನ ಉಪಯೋಗ:
ಬಿದಿರು ಬಹುಉಪಯೋಗಿ. ಬಿದಿರಿನಿಂದ ವೈವಿಧ್ಯಮಯ ವಸ್ತುಗಳನ್ನು ತಯಾರಿಸುವ ಕಲೆಯನ್ನು ಜನರೂಢಿಸಿಕೊಂಡಿದ್ದಾರೆ. ಬಿದಿರಿನ ಬಳಕೆಯ ವ್ಯಾಪ್ತಿ ಹಾಗೂ ಬೇಡಿಕೆ ಹೆಚ್ಚುತ್ತಿದೆ. ಬಿದಿರಿನಿಂದ ಬಟ್ಟೆಗಳನ್ನು ತಯಾರಿಸಲಾಗುತ್ತದೆ. ಕರವಸ್ತ್ರ, ಸ್ನಾನದ ಟವೆಲ್, ಮಕ್ಕಳ, ಹಿರಿಯರ ನಾನಾ ತರದ ಉಡುಪುಗಳನ್ನು ತಯಾರಿಸಲಾಗುತ್ತದೆ. ಬಿದಿರಿನಿಂದ ತಯಾರಿಸಿದ ಅಲಂಕಾರಿಕ ವಸ್ತು ಬುಟ್ಟಿ, ಚಾಪೆ ಹಾಗೂ ಕಾಗದದ ತಯಾರಿಯಲ್ಲಿ ಮನೆಗಳ ನಿರ್ಮಾಣ, ತೊಟ್ಟಿಲು, ಕೃಷಿ ಉಪಕರಣಗಳು, ಪೀಠೋಪಕರಣಗಳು, ಕುರ್ಚಿ ಮೇಜು, ಬೀಸಣಿಕೆ ತಯಾರಿಕೆಯಲ್ಲಿ ಅಗ್ರಸ್ಥಾನ ಪಡೆದಿದೆ. ವಿವಿಧ ಕರಕುಶಲ ವಸ್ತುಗಳ ರೂಪದಲ್ಲಿ ಮನೆಗಳನ್ನು ಅಲಂಕರಿಸುವ ಗೃಹೋಪಯೋಗಿ ವಸ್ತುವಾಗಿಯೂ ಬಿದಿರಿನ ಬಳಕೆಯಾಗುತ್ತಿದೆ. ಬಿದಿರಿನ ಕಳಲೆಯ ಪಲ್ಯ, ಉಪ್ಪಿನಕಾಯಿ ರೂಪದಲ್ಲಿ ಬಳಸಲಾಗುತ್ತದೆ. ಪೂರ್ವಜರಿಂದ ಕಲಿತ ಬಿದಿರಿನ ಗುಡಿಕೈಗಾರಿಕೆಯನ್ನು ಮುಂದುವರಿಸುವ ಕುಟುಂಬಗಳನೇಕ ಇವೆ. ಬಿದಿರಿನ ಪಾಲಿಗೆ ಒದಗಿದ ಹೊಸ ಕಾನೂನು ಈ ಉದ್ಯಮದಲ್ಲಿ ಭಾರತೀಯರು ಇನ್ನೂ ಹೆಚ್ಚಿನ ಸಂಖ್ಯೆಯಲ್ಲಿ ತೊಡಗುವಂತೆ ಆಸಕ್ತಿ ಮೂಡಿ ಅವರಿಗೆ ಸಸ್ಯಶಾಸ್ತ್ರಜ್ಞರು ಬಿದಿರಿನ ಉದ್ಯಮಕ್ಕೆ ಹೆಚ್ಚಿನ ಮಾಹಿತಿ ನೀಡಿದರೆ ನವತರುಣರು ಈ ಉದ್ಯಮಕ್ಕೆ ಮನಸ್ಸು ಮಾಡಿದರೆ ಉಜ್ವಲ ಭವಿಷ್ಯದ ಉದ್ದಿಮೆ ಬಿದಿರು ಎನ್ನಬಹುದು. ಆಧುನಿಕ ಪ್ರಪಂಚ ಎಷ್ಟೇ ಮುಂದುವರಿದರು ಆದಿಕಾಲದಿಂದಲೂ ಉಳಿದುಕೊಂಡು ಬಂದ ಬಿದಿರಿನ ಬಳಕೆ ಇನ್ನೂ ಜೀವಂತವಾಗಿದೆ. ಬಿದಿರಿನ ಉತ್ಪನ್ನಗಳ ತಯಾರಿಕೆ ನಂಬಿಕೊಂಡು ಬದುಕುತ್ತಿರುವ ನೂರಾರು ಕುಟುಂಬಗಳಿವೆ.

Leave a Reply

Your email address will not be published. Required fields are marked *